《盲頭烏蠅 誤墮名利網》蘋果日報

今年小母牛競步籌款活動，Carrie義畫籌款。

亞馬遜雨林內的巨樹有如摩天大廈，Carrie直言置身其中，只覺人類渺小。

《盲頭烏蠅　誤墮名利網》蘋果日報

日期：2012年11月15日

Carrie Chau（鄒蘊盈），著名本地插畫師，未夠30歲，已三度舉辦個人畫展，筆下的「黑羊」及「盲頭烏蠅」，大受歡迎，宏願是透過畫作，讓人看見世界的真善 美。但諷刺的是，年少成名卻不快樂，看到的盡是灰色。兩年前，悄悄結束中環的Gallery，獨個兒周遊列國，到亞馬遜熱帶雨林探險、走進復活島與神秘石 像對話，又跟隨慈善團體到內地扶貧，找回最純樸但快樂的感覺。記者：呂麗嬋

「呢幾年，好多人都話我越嚟越商業化，出咁多精品賣錢，但又無乜新創作。但其實，我同你一樣，都係去到精品店，見到黑羊燈、見到個燭台，我先知道： 『哦，原來出咗件咁嘅嘢。』咁多年嚟，我只係駐設計公司嘅插畫師，打工仔一名，兩年前，我辭職，結束埋我中環嘅Gallery。呢啲精品，都係公司出品。
03 年出道，轉眼差唔多十年，嗰時，我只係個妹，夢想做畫家。有得畫、啲畫有人欣賞，就開心。成名得早，唔成熟，內心好迷失。我曾經話過我係外星人轉世，同 地球人溝通困難，原來係真嘅。有段時間，我只係一睜開眼就畫畫畫，身邊有好多助手，我忙到連身邊發生咗乜事都唔知，生活技能係零，乜都有人代勞，連訂張機 票，都唔識。
]

人原來只係好渺小

如是者，做咗七年。兩年前，我決心改變辭職，我將之前好想做，但無時間做嘅嘢列晒出嚟：我住喺大埔村屋，門前有塊田一直都荒廢，想開闢嚟做有機耕 作；我想去勻全港嘅沙灘，拍一張照片做紀錄；我好易水腫，想每日定時運動，過啲健康生活。仲有最想最想做嘅，係去一次好長好長嘅旅行，一個人上路。
上 年，我先後去咗好多次旅行，一年之中，大半時間都唔喺香港。去咗快樂國不丹、去咗南美，仲有去咗我一直好想去嘅亞馬遜熱帶雨林。所有旅程，我都一個人去， 但喺異地，我一啲都唔孤單，識咗好多嚟自世界各地嘅朋友。俾吸血蟲咬，大家四處張羅搵藥膏，守望相助；企喺森林入面全世界最大嘅樹面前，人，原來只係咁渺 小。

名利變得不再重要

我最記得，去復活島嗰日，遇正大雷雨，遊客都躲在Hostel，只有我堅持行程。喺千萬年前已存在嘅石像前面，成個島，就好似只有我同遼闊嘅天地， 畢生難忘。所謂嘅煩惱、曾經好着緊嘅名利，變得唔再重要。返港之後，我仲跟隨慈善團體國際小母牛，四處去探訪，去河北、又去咗曾經大地震嘅汶川重建災區， 教小朋友畫畫。
家，我終於又再重新攞起畫筆，我希望將過去兩年嘅諗法整理，畫一個叫game of life嘅系列。畫拼畫、畫層層叠，人生，都係由唔同經驗拼貼出嚟，如果可以視為一場遊戲，應該幾快樂。我仍然會開畫展，可能會租一間餐廳，或者借用小小 嘅Gallery舉行，找回最簡單嘅快樂感覺，比乜嘢都重要。」

反叛任性做快樂黑羊

曾於時代廣場聖誕黃金檔期舉行大型畫展，又備受大品牌垂青，成名甚早的Carrie，不諱言自己是幸福的人，「我從來都隨心所欲，好任性」。生於小康之家，姐姐是執業律師，父母是專業人士，初中時，她便因為拒絕「畫得越似就越高分」的教育模式，放棄選修最愛的美術科。
17 歲，會考無考過美術科，理大設計系破格取錄，成為同屆唯一中五生，但同年卻考包尾，要留級，被父母送到外國讀書。學成回港，卻又誤打誤撞，憑天份備受力 捧，做了全職畫家，「我嘅幸福在於家人、朋友對我嘅包容，唔係因為錢，好多人以為我早成名，生活無憂，但其實，錢永遠都可以唔夠，只在乎你係咪有決心改善 現狀，重新開始」。渴望做隻真正快樂黑羊的Carrie說。

資料來源：http://hk.apple.nextmedia.com/news/art/20121115/18067660